जापानका मुख्य क्याबिनेट सचिव मात्सुनो हिरोकाजुले उत्तर कोरियासँग भएको वार्ताबारेको मिडिया रिपोर्टको खण्डन गरेका छन् ।
सोमबारमात्रै दक्षिण कोरियाली एक अनलाइनले स्रोतलाई उदृत गर्दै उत्तर कोरिया र जापानबीच तेस्रो विश्वमा गोप्य वार्ता भएको खुलासा गरेको थियो ।
दक्षिण कोरियाको चर्चित डोङ ए इल्बोको सोमबारको संस्करणको पहिलो पृष्ठमा उत्तर कोरिया र जापानबीच चीन, सिंगापुर र अन्य स्थानमा गोप्य सम्पर्क भएको उल्लेख गरेको छ ।
जापान र उत्तर कोरियाली अधिकारीहरुले उत्तर कोरियाले जापानी नागरिकको अपहरण र उच्चस्तरीय सरकारी वार्ताको सम्भावना लगायतका विषयमा छलफल गरेको बताइएको छ ।
यद्यपि यसरी भएका गोप्य वार्तामा दुई देशबीचका असमझदारी अन्त्य गर्न भने असफल भएको उल्लेख छ ।
जापानले अमेरिकालाई भने उत्तर कोरियासँग सम्पर्क स्थापित गर्न लागेको विषयमा यसअघि नै जानकारी गराएको पनि पाइएको छ ।
दुई महिनाअघि जापानी प्रधानमन्त्री फुमियो किशिदाले उत्तर कोरियाको अपहरणमा परेका जापानी नागरिकको रिहाईका लागि उच्चस्तरीय वार्ता गर्ने बताएका थिए ।
उत्तर कोरियाले भने आफ्नो अपहरणमा कुनै जापानी नागरिक नरहेको स्पष्ट पारेको थियो । यद्यपि उसले जापानले सम्बन्ध सुधार गर्न चाहेमा उच्चस्तरीय वार्ताका लागि कुनै समस्या नहुने पनि उल्लेख गरेको थियो ।
यद्यपि जापानका मुख्य क्याबिनेट सचिवले भने मिडिया रिपोर्टलाई अफवाह भएको भन्दै खारेज गरेका छन् ।
उनले पत्रकारको प्रश्नको जवाफ दिँदै आफूले कुनै पनि कुराको उत्तर दिनबाट बच्न चाहेको र कुनै विवरण बाहिर आएमा भावी वार्ता प्रभावित हुनसक्ने उल्लेख गरेका छन् ।
