नुवाकोट । नेपाली ढिंडो र गुन्द्रक खान आएको जापानीहरुले नुवाकोट जिल्लाको फिकुरी गाबिस डिगाउँका ५५ घर धुरीलाई पुग्ने खानेपानी योजना निर्माण गरिदिएका छन् ।
पानी खान धौधौ परेका बेला जापानमा रहेको नेपाली रेष्टुरेन्ट पुर्जा डाईनिङको प्रोप्राईटर छक्कु उदासीको सक्रियतामा जुटेको रकमले खानेपानी परियोजना सम्पन्न भएको हो ।
पछिल्लो वर्ष गएको विनाशकारी भूकम्पले नुवाकोटमा पानीका मुहानहरु सुके पछि डिगाउँमा पानीको हाहाकार मच्चिएको थियो ।
जापानवासी व्यावसायीको सक्रियतामा खानेपानीको सुविधा प्राप्त भए पछि भूकम्पले दिएको दुख केहि हदसम्म मेटिएको भन्दै गाउँलेहरुले खुसि व्यक्त गरेका छन् ।
खानेपानी परियोजनाको दिर्घकालिन संरक्षण र प्रवद्दन गर्नका लागि स्थानीय छत्र बहादुर लामाको संयोजकत्वमा संरक्षण समिति गठन भएको स्थानीयले बताएका छन् ।
त्यस्तै गरि भैपरी आउँदा खानेपानी समितिलाई सहयोग गर्ने गरि नुनप्रसाद सोमै मगर, कबिराज गिरी, रमेश गिरीलाई समेत समितिमा राखिएको छ ।
भूकम्पपीड़ित जनताको सेवाको निम्ति डिगाउँ राहत कोष समेत गठन भएको थियो । गाउँलेहरुको लागि राहतकोषमा जापानी नागरिक यामाकी युकियो र जापानवासी नेपाली उद्यमी उदासीले रकम सहयोग गरेका थिए।
यही जुन महिनाको ४ तारिक शनिवार जापानी नागरिक यामाकी युकियो र नेपाली रेष्टुरेन्ट पुर्जा डाईनिङका प्रोप्राईटर छक्कु उदासीले ३ वटा धाराहरुको उद्घाटन गरेका हुन् ।
त्यस्तै खानेपानी योजना निर्माण पछि बचेको रकम द्वन्द र भुकम्प पिडीत बालबालीकाहरुको सहयोगको लागि “एकीकृत सिर्जनशील समाज नेपाल” की संचालिका जुनु पुनलाई नगद २० हजार हस्तान्तरण गरिएको थियो ।